Isaki Lacuestaren “Los pasos dobles” urrezko maskorraren irabazle

Filippos Tsitosek jaso du zuzendari onenaren saria, Antonis Kafetzopulosek aktore onenarena eta Kore-edak gidoi onenarena

Oso apustu ausarta egin du film honekin Isaki Lacuesta zinemagileak, baina ezustekoa izan arren, etxera eraman du Donostiako Zinemaldiaren 59. edizioko sari nagusia “Los pasos dobles” filmarekin.

Aurten ez zegoen faborito garbirik, baina epaimahaiak harrituta utzi du publikoaren zati handi bat, Lacuestaren filma ez baitzegoen faboritoen artean. Film hau Afrikan grabatu zuten eta jasan dituen kritika guztiez gain, bertako paisaiak eta jendeak lagundurik, momentu magikoak transmititzea lortu du Lacuestak.

Txalo artean Frances McDormand epaimahaiburuaren eskutik jaso zuen Urrezko Maskorra saritu nagusiak eta Kore-eda, Urbizu, Zambrano, Ripstein edo Davisen bezalako artisten ondoan lan egitea “luxu izugarria” izan dela aipatu zuen. Hala ere, aipatutako zuzendariek ez zuten sari potolorik jaso. Filippos Tsitos eta Antonis Kafetzopulos greziarrek eraman zituzten sari nagusietako bi, eta gaur egun Grezian zinema egitea zaila izan arren, dena posiblea dela erakutsi diote munduari.

Mendizale bizkaitar baten gorpua erreskatatu dute Huescako Pirinioetan

Peña Foratata tontorra igotzen ari zela erori eta hil egin zen mungiarra

Guardia Zibilak Mungiako 31 urteko gizonezko baten gorpua erreskatatu zuen atzo Aragoiko pirininioetan. Peña Foratata tontorra igotzen ari zela erori eta hil egin zen, pirinioetako Sallent de Gallego herriko lurretan, Huescako probintzian (Espainia).

Huescako Gobernuko azpi-delegazioak azaldu duenez, senideek haren falta somatu eta abisua eman zuten. Guardia Zibileko espezialistek ostiralean ekin zien bilatze lanei. Hasieran mendizalearen autoa aurkitu zuten Formigaleko neguko estazioko urbanizazio batean aparkatuta. Ordu bete beranduago hildakoaren gorpua topatu zuten tontorraren mendebaldeko aldean, gailurretik ehun bat metroko distantziara. Gorpua etzanda zegoen “dekubito-supino” delako egoeran, erorketa baten ondorioz. Larunbatean erreskatatzea lortu zuten, garabide sistema bati esker. Hildakoa R.B.O. da, gizonezkoa, Laukariz-Mungiako bizilaguna (Bizkaia).

Irungo udalak plaka bat jarri du Gerra Zibilean fusilatutako bi zinegotziren omenez

Evaristo Larrañaga eta Florencio Iracheta 1938ko martxoaren 10ean fusilatuak izan ziren Burgosen

Irungo Udalak plaka bat jarri zuen pasa den larunbatean bi zinegotzien omenez, herriko Udaletxeko eskailera nagusien ezkerraldean. Ekitaldian Larrañaga eta Irachetaren senitartekoak, udaleko korporazioa, eta Irungo beste hainbat bizilagun elkartu ziren, eta oroimena eta emozioa izan ziren nagusi.

Ekitaldiaren hasieran Jose Antonio Santano alkateak fusilatutako bi zinegotzien bizi izan ziren bitartean defendatu zituzten baloreak gogoratu zituen, plaka berriak egiten duen bezala. “Askatasuna eta demokrazia defendatu zutelako” irakurri daiteke bi izenen azpian. Ektaldian izan ziren inegotzien alabei plaka honen erreprodukzio bana eman zitzaien.

Evaristo Larrañaga Urcelayeta eta Florencio Iracheta Quilez 1931ko hauteskundeetan aukeratu zituzten, irundarren ordezkari izateko. Zazpi urte beranduago, 1938an legez kontrako gerra-kontseilu batek heriotzera kondenatu zituen. Urte bereko martxoaren 10ean fusilatuak izan ziren. Plaka honek haien oroimena gorde nahi du, etorkizuneko irundar guztiek gogoan izan ditzaten.

Hurrengo udan Bilbo-Miami ibilbidea egongo den azaroan erabakiko da

Euskal aireportua promozionatzeko bilduko dira Florida estatuko ordezkariak, Bilboko Merkataritza Ganbera eta Bilbao Air-ko arduradunak

Azaroko lehengo astean biltzeko dira Florida eta Bilboko ordezkariak Estatu Batuetako ordezkaritza batean, eta bertan erabakiko dute Euskaditik aterako den lehen ozeanoz handiko hegaldi erregularra egingo den. Bi herrialdeetako turismoa sustatzea eta Bilbok eskaintzen dituen  hainbat zerbitzu eskaintzea da konexio berri honen helburua.

Orain dela bi urte sortu zen ideia eta ordutik ari da Bilbao Air euskal aireportua sustatzen duen sozietatea harremanetan Floridako estatuarekin. Jon Gangoiti Bilbao Air-eko zuzendari gerenteak adierazi duen arabera, hurrengo udan Bilbo-Miami ibilbidea egingo bada, azaroan egingo den bilkura horretan erabaki beharko da, izan ere, bi hirien arteko ibilbidea promozionatzen hasi beharko da Gabonen ostean.

Latinoamerikako turismoa erakarri nahi  du ibilbideak bereziki. Hala ere, Bilbon interesatuta ere badaude Amerikako Estatu Batuak, Europako beste zenbait tokiekin kontaktuan jartzeko.

Oinarrizko elementu batzuk erabakitzeko geratzen zaizkie oraindik Miamiko aireportuko ordezkariei, Euskadi zein touroperadoreak bultzatuko duen ez baitago argi eta konexiorako zein hegazkin mota erabiliko den ez baitakite ziur. Bilbao Air-eko Jon Gangoitik, aldiz, argi dauka zein hegazkin mota erabili daitekeen. “ Hegazkin txikia da komenigarriena, lur hartzea eta aireratzea errazagoa izateko ez ezik,  hegazkina ahalik eta hoberen betetzeko”, azaldu du zuzendariak.

Nafarroa kalitatezko irakaskuntza publikoaren alde

Urriaren 22an manifestazioa egingo da Iruñean

Sindikatuek eta Nafarroako guraso asoziazioek eskola publikoaren aldeko manifestazioa konbokatu dute urriaren 22rako eta 2012an hezkuntzak murrizketa gehiago ez jasateko deia egin diote Gobernuari.

            Datorren urterako Gobernuak ezarriko dituen murrizketek irakaskuntza publikoaren kalitatea arriskuan jarriko dutela uste dute arloko hainbat eragilek. Hori ekiditeko “kalitatezko irakaskuntza publikoren aldeko martxa” antolatu dute, kalitatezko hezkuntza "jendarte osoarentzat ekitatearen eta gizarteratzearen bermea” dela azpimarratuz.

            Guraso elkarte eta sindikatuetako ordezkarien iritziz Gobernuak diru nahikoa badu, baina ez du hezkuntza publikoa hobetzeko erabili nahi. Espainian hezkuntzarako inbertsio publikoa oso baxua dela salatu dute ( BPGaren %4,5) beste herrialde batzuetan, aldiz, %5,5 edo %5,8koa delarik. Gainera, 2011an Nafarroan Hezkuntza gastuak %13an murriztu dira (50 milioi euro inguru) eta horrek hezkuntzaren kalitatea duela urte batzuk baina kaskarragoa izatea ekarri du.

Horregatik, Gobernuari murrizketa gehiagorik ez egiteko exijitu diote beraien seme-alabentzako “hezkuntzarik hoberena” nahi baitute, eta kalitatezko irakaskuntza publikoaren alde dagoen edonor murrizpen horien aurka mobilizatzeko deia egin dute, urriaren 27ko greba babestuz.

Informazio gehiago:

http://gerindabai.blogspot.com/2011/09/22-de-octubre-manifestacion-en-defensa.html

Zubi eseki zaharberritu bat

Bere historian izan duen erreformarik garrantzitsuena jasan du Bizkaiko zubiak

Hamaika hilabetez aldamioz estalita egon ondoren, libre da jada Bizkaikozubia. Kolore aldaketa ez ezik, beste hainbat berrikuntza eta aldaketa jasan ditu zubiak. Denborak, hezetasunak eta gesalak bere egitura kaltetu dute eraiki zenetik eta Jose Antonio Dolara zubiaren harreman instituzionalen zuzendariaren arabera behar beharrezkoa zuen erreforma.

Orain dela 118 urte eraiki zen zubia Portugaleten eta Gerra Zibilean Getxoko errepublikar batzuek eztanda egin zutenetik ez zuen aldamiorik izan. 1.079.540 euro jarri ditu Sustapen Ministerioak eta beste 100.000 Bizkaiko Foru Aldundiak. Idom ingeniariari enkargatu zioten lana eta hauek kalteak bereizteko eskaner tridimentsionala egin ostean, zubia itsasadarrera lotzen zuten zutabeak guztiz kaltetuta zeudela ondorioztatu zuten. Horrez gain, burdinazko barrak hondatzen hasiak ziren, beraz, horiek ere aldatu beharra zegoen.

Nahiz eta begi bistan kolore aldaketa baino ez bereizi, aldaketa asko egin zaizkio zubiari. “Gauza eta pieza asko aldatu dira zubian, baina jendeak koloreari baino ez dio erreparatzen, deigarriena baita”, adierazten du Jose Antonio Dolarak.  Munduan bakarra den zubia denez, hainbat pieza berri egin behar izan dituzte berarentzat eta merkatuan dagoen onena erabili dela baieztatu du Dolarak.

Informazio gehiagorako jo http://www.deia.com/2011/09/19/bizkaia/el-puente-colgante-descubre-hoy-la-reforma-mas-importante-de-su-historia webgunera.

Donostiako 59. Zinemaldia

Zuzendariek egindako lanez gain, aurtengo edizioan zinema ikasleen hamahiru lan erakutsiko dira

Irailaren 21etik 23ra Donostiako Zinemaldian Zinema ikasleen X. topaketak egingo dituzte. Topaketa horietan 134 lanen artean hautatutako hamahiru film labur proiektatuko dira.

            Film labur hauek hamar herrialde desberdinetako jatorria dute eta hain zuzen ere, topaketa hauen helburua mundu osoko zinema ikasleen lanak ezagutzera ematea da. Aipatutako topaketa horietarako 25 herrialdetako 56 eskolatako lanak aurkeztu dira, baina aurten Polinia, Erresuma Batua, Maroko, Espainia, Alemania, Israel, Kolombia, Italia, Argentina eta Herbeeretako filmak ikusi ahal izango ditugu.

             Aurten “Intruders” deituriko film fantastikoak irekiko du Donostiako Zinemaldia. Juan Carlos Fresnadillo espainiarrak zuzendutako film honetan Pilar Lopez de Ayala, Daniel Bruhl edo Clive Owen bezalako aktoreak ikusiko ditugu, eta Nicolas Casariego idazlearen gidoi aberatsez gozatu ahal izango dugu.

            Hala ere, aipatutako filmaz gain besta hainbat eta hainbat zuzendariren lanak egonen dira Donostian ikusgai, hala nola, Asier Altunaren “Bertsolari”, Steve McQueen-en “Amen”, Wim Wenders-en  “Pina”, Gotzon Elorzaren “Elburua Gernika” edo Sandra Sánchez-en “Tralas luces”. Osotara, 245 bat film ikusi ahal izango ditugu egun hauetan zehar eta horietako askok sari desberdinak jasotzeko aukera izango dute Sail Ofizialeko Sariez gain, adibidez: Euskaltel Gaztearen Saria, Serbitzu Zinemira Saria edo Publikoaren Saria.

Azken berriak:
http://www.argia.com/zinemaldia-2011/
http://kartelartean.blogspot.com/2011/05/donostiako-zinemaldia-2011.html

Muskizko XXIX. nekazaritza eta abere azoka ehunka pertsona biltzekoa da igandean

Igor Eguren Ordiziako alkatea han izango da, aurtengo azokaren laguntzaile garrantzitsua izan baita Ordizia

Hainbat pertsona bilduko ditu Muskizko XXIX. nekazaritza eta abere azokak. Nerbioi inguruko baserritarrentzat egun garrantzitsua dena, San Juaneko landetan ospatuko da eta han izango dute aukera baserritarrek euren produktuak salmentan jartzeko.

Dendatxoak utzi dizkio Ordiziako udalak herri bizkaitarrari, eta berari esker 20.000 euro aurreztu ditu Muskizek. Beraz, Muskizen izango da Ordiziako alkatea den Igor Eguren.

Fruta, barazki,ogi, eztia eta gaztak eskainiko ditu aurtengo azokak. Behiak, zaldiak eta ahuntzak ez ezik, gamelu, zebra eta llama animali exotikoak ere ikusi ahal izango dira. Txakolin eta beste zenbait lehiaketa ere egongo dira. Txakolin onenari urrezko domina emango diote eta zaldi lasterketa eta txakur erakustaldiak egongo dira.

 “Lehenengo sektorea indartzea du helburu feriak, baserritarrek beraiek ekoiztutako produktuak bitartekari gabe saldu ditzaten”, adierazten du Borja Liaño alkateak. Hala ere, azokak bertako herritarren interesa piztu eta egun alai bat pasatzera gonbidatzen du.

Sortu zenetik asko handitu omen da Muskizko azoka eta azkenengo urteetan Bizkaiko hainbat tokitatik joan da jendea eguna pasatzera Muskizera. Iñaki Lejarza zinegotziaren laguntzaz sortu zen azoka, aurten 150 erakusle bilduko ditu.

Mugaranzko tunela irekita

Belateko Tunela bi hilabetez itxita egon da kamioi baten suteak eragin zituen kalteak konpontzeko

Aste honetan Belateko Tunela (Nafarroa) berriro ireki dute bi hilabeteren ondoren. Denbora honetan konponketa lanetan ibili dira, Uztailaren 8an kamioi batek tunelaren barruan su hartu eta kalte larriak eragin baitzituen. Jada trafikoa bere normaltasunera itzuli da N-121-A errepidean.

Irekiera honek garrantzi handia izan du Baztan-Bidasoa inguruko biztanleentzat, egunean milaka pertsonek  igarotzen baitute tunel hori lana edo erosketak direla medio. Baina inguruko populazioaz gain, batez ere Espainiatik eta atzerritik datozen kamioiek Frantziako mugara heltzeko bide hori erabiltzen dute, Iruñea (Nafarroa) Irunekin (Gipuzkoa) lotzen baitu. Errepide hau Espainiatik Frantziara heltzeko errepide erabiliena da estatuan. Estatistikek diotenez, egunean 10.000 pertsona inguru igarotzen dira Belateko tuneletik eta haietatik 2.300 baino gehiago kamioiak dira.

Konponketa lanek iraun duten bitartean ibilgailu guztiak Belateko portutik desbideratuak izan dira. Errepide hori Belateko tunela egin aurretik erabiltzen zen eta bide berria baina askoz ere luzeagoa da, kurba gehiago ditu eta desnibel handiagoa du. Arrazoi horiengatik, bi hilabete hauetan ibilgailuek ibilbide deserosoago bat egin behar izan dute, baina hemendik aurrera bidaiari guztiek Belateko tunela igaro ahal izango dute, duela bi hilabete bezala. 

Errekaldeko bizilagunek Kukutza gaztetxea lekuz aldatzeko Udalaren proposamena ukatu dute

Ertzaintzak Gaztetxea husteko agindua jaso du aste honetan

Bilboko Errekaldeko auzo elkarteko kideak Barkala  Bilboko Hirigintza zinegotziarekin bildu ziren atzo, eta udaletxetik Gaztetxea lekuz aldatzeko egin dieten proposamenari ezezkoa eman diote. Igor Ahedo bizilagunen bozeramailearen hitzetan “ez dago gaur egungo eraikina ez den beste aukerarik”.

 Bizilagunek alokairu bat ordaintzea eskatu diote udalari, baina bi aldeak akordioren batera iristea zaila izango dela dirudi. Cabisa enpresarena da gaur egun Kukutza Gaztetxea dagoen eraikina eta orain Gaztetxea eraitsi nahi du bertan etxebizitzak eraikitzeko. Barkalak esan du Udalaren esku hartzea amaitu dela, eraikinak jabetza pribatua duelako. Hainbat gazte Bilboko udaletxean sartu ziren asteazkenean Iñaki Azkunarekin elkartzeko asmoz. Alkateak gazteei bilera ukatu zien.

Kukutza Gaztetxeak 13 urte daramatza Bilboko Errekalde auzoan, eta denbora guzti honetan kultur gune garrantzi bilakatu da, Euskal Herri mailan ere. Gainera Errekalde auzoaren berpiztean garrantzi handia izan du. Zenbait jendek gaua pasa du gaztetxean aste honetan zehar, eta Zea Mays eta Anje Dhualderen kontzertuak izan dira elkartasun keinu moduan. Manifestazioa eta lipdub-a bezalako bestelako saiakerak ere egin dira Kukutzari babesa emate aldera.

Toulouseko Occitania jaialdian parte hartuko du Santurtziko konpartsak

Jaialdian leku askotako taldeak bilduko dira eta, Santurtzik bere herriaren zatitxo bat aurkeztuko du Toulousen erraldoi eta buruhandien bitartez

Frantziara joatera gonbidatu zuten Santurtziko Mendi Alde dantza taldea Karmengo jaietan eta hurrengo larunbatean han izango da taldea, Santurtziren ordezkari. Estatuaren mugetatik at doan lehengo aldia da talde euskaldunarentzat eta Mundi Flores taldeko presidenteak oso pozik daudela eta taldearentzat ohore bat dela adierazi du.

Goizeko zapietan abian jarriko dira santurtziarrak eta sei ordutan han egongo dira. Buruhandi eta erraldoiak garraiatu ditu hamazortzi metrotako zirgariak, taldeko 24 kideek, aldiz, autobusez bidaiatuko dute.

Larunbateko arratsaldeko bostetan Toulouseko kaleetan kalejira hasteko asmoa du Mendi Aldek eta horretarako herri arrantzalean tradizionalak diren Arrantzalea, Sardinera, Minero eta Lavandera erraldoiak paseatuko dituzte. 2005ean berreskuratutako Don Elías, Currito eta sardinerak, Sotera eta Bella Charo ere arituko dira dantzan. “Ikusiko direnak asko harrituko dute publikoa, batez ere arrantzale eta sardinera erraldoiak oso koloretsuak baitira”, aitortu du Mundi Floresek, eta Bizkaitik atera diren bakoitzean bertako figurak oso atseginak suertatu direla adierazi du.

Dantzan aritzeaz gain, taldeak Santurtziko turismoa bultzatu nahi du eta horretarako herrialdeko dosierrak eramango ditu gazteleraz eta ,ahal izatekotan, frantsesez.

Emakume bat hil da Hondarribiko alardean gertatutako ezbehar baten ondorioz

Kosta konpainiako kide batek bere burua aurkeztu du Irungo Ertzain etxean

Emakume bat hil zen pasa den irailaren 10ean Donostiako ospitalean, bi egunez koman egon ondoren. Ertzaintzak gizonezko bat inputatu du, Zuloaga kalean desfilatzen zegoela airera egindako tiro baten ondorioz 65 urteko emakumeari lesio larria eragitea egotzita.

Ertzaintzaren lehen hipotesiaren arabera, airera eginiko tiro baten kartutxoaren zati batek jo zuek emakumea. Beste hipotesi baten arabera tiroen zaratak izutu zuen andrea, alardea balkoitik ikusten ari zenean. Edonola ere, lurrera erori eta buruan kolpe handia hartu zuen emakumeak. Senide batek anbulantziara deitu eta Donostiako hospitalera eraman zuten. Bertan egon zen hil zen arte.

Ertzaintzak jakinarazi duenez alarde tradizionaleko hainbat kidek tiroak egin zituzten airera ezbeharra gertatutako kale horretan. Alardean deskargak egiteko leku jakinak daude, eta ibilbidearen gainontzekoan tiro egitea debekatzen zaie parte hartzaileei, segurtasun arrazoiak direla eta.

Hondarribiko Udaleko bozeramaileen batzordeak senitartekoei elkartasuna adierazteko  hainbat keinu izan ditu: udaletxeko banderak kentzea, pilota partiduan isilunea egitea eta su festa bertan behera uztea besteak beste. Gainera txosnen batzordeak irailaren 10ean senitartekoei zuzendutako gutun bat irakurri zuen, Ken Zazpi eta Koma taldeen kontzertuen aurretik.